विषयवस्तुमा जानुहोस्

नेपालभाषा ब्वंकीपिनि प्रशिक्षण (Training to Nepal Bhasa Teachers)

अप्रील 27, 2012

नेपालभाषामा लेख
Article in NEPAL BHASA (Newari Language)
This article is in DEVANAGARI script.
साभार: गोरखापत्र,
ने. सं. ११३२ बछलाथ्व खास्थि
वि. सं. २०६९ बैशाख १५ गते शुक्रबार

 नेपालभाषा ब्वंकीपिनि प्रशिक्षण

न्हयब्व:म्ह शीला साय्‌मि

नेवा: देय्‌ दबू, नेवा: वस्ती नेवा: स्कूल अभियान व नेपालभाषा स्यनेकने पुच:या ग्वसालय् स्वन्हुयंकं  जूगु नेपालभाषा स्यनामिपिनि प्रशिक्षण ज्याझ्व: नकतिनि क्वचाल। नेपालभाषा ब्वंकाच्वंगु ब्वनेकुथि व न्हुगु शैक्षिक सत्रनिसें नेपालभाषा ब्वंकेत्यंगु झिंगुगू व्वनेकुथिया स्यनामिपिंत जक उगु प्रशिक्षण बिउगु ख:। प्रशिक्षणय् मुक्‍कं पीम्ह स्यनामितय्‌सं ब्वति का:गु ख:सा झिंछम्हेसिनं प्रशिक्षण बिगु ख:।

नेपालभाषा विषय प्रभावकारी व व्यवस्थित रुपं ब्वनेकुथिइ स्यनेगु ता:तया: उगु प्रशिक्षण नह्याकूगु ख:सा ब्वमिपिंत नेपालभाषाप्रति गुकथं आकर्षित यायेगु धइगु विषयय् नं प्रशिक्षण बिउगु ख:।

प्रशिक्षणया न्हापां कुन्हु नेपालभाषा स्यनेकने पुच:या न्वकु सानुकाजी महर्जनं प्रशिक्षण बियादिगु ख:सा उगु कक्षाय् वय्‌कलं मातृभाषाया संरक्षण गुकथं यायेगु व थ:गु मातृभाषा गुलि तक महत्वपूर्ण जू धइगु विषयय् प्रशिक्षण बियादीगु ख:। अथे हे पुच:या नाय: रमिता शाक्यं नेपालभाषाया कक्षा गुकथं संचालन यायेगु धइगु विषयय् बियादीगु ख:। प्रशिक्षणय् कार्टुनिष्‍ट रबिन साय्‌मिं कार्टुन चित्रपाखें नेपालभाषा गुकथं ब्वंकेगु धका: कनादीगु ख:सा जगतसुन्दर ब्वनेकुथिया सुनिता मानन्धरं ओरी-गामी, उगु हे ब्नेकुथिया रत्‍नदेवी कसां ‘मचा बाखँ’, मोडर्न नेवा: स्कूलया लसता सिंहं नेवा: व गैर नेवा:त दुगु कक्षाय् नेपालभाषा गुकथं ब्वंकेगु धयागु विषयय् अले स्यनामि लिसें कलाकार मय्‌जु सृजना महर्जनं नृत्य व संगीतया माध्यमं नेपालभाषा ब्वंकेगु धयागु विषयय् प्रशिक्षण बियादीगु ख:। थुकियालिसें नेवा: वस्ती नेवा: स्कूल अभियानया कजि दिपक तुलाधरं नेपालभाषाया सामान्य व्याकरणया विषयय्, शिक्षा विभागया डा. सुमनकमलं बहुभाषी शिक्षा, विद्योदय मा. वि. या स्यनामि उज्वलतारा बज्राचार्यं अभिनय व कला व नेवा: इन्टरनेशनल स्कूलया प्रधानाध्यापक रेणुका बज्राचार्यं इन्टरनेटया माध्यमं नेपालभाषा स्यनेगु विधि ’bout प्रशिक्षण बियादीगु ख:।

स्वन्हयंकया कक्षाय् नेवा: देय् दबुली हे जूगु ख:सा व्यावहारिक कक्षा न्यू जेनिथ इङ्ग‌लिस स्कूलय् जूगु ख:। प्रशिक्षण ज्व:छिया कक्षा बिचा: याना स्वयां अप्व: उपलब्धीमूलक जूगु ग्वसा: खल:या धापू दु। अथे हे प्रशिक्षणया झ्वलय् थ:पिंसं ब्वनेकुथी स्यनाच्वनागु स्वयां अप्व: प्रभावकारी जूगु प्रशिक्षार्थीतय्‌सं प्रतिक्रिया बिउगु ख:।

काठमाडौं नेवा: किन्डरगार्टेनया स्यनामि (प्रशिक्षार्थी) सुनिला महर्जनं प्रशिक्षण विधि तसकं बांला:गु व अ:पु जूगु धासें थुगु कक्षां थ:त मांभाय्‌या महत्व थुइका बिउगु खँ कनादिल। अथे हे अन्‍नपूर्ण स्कूलया स्यनामि निलहिरा शाहीं नं किपा, बाखं, अभिनय व कलाया माध्यमं स्वयां कासा म्हितका: स्यनेगु विधि थ:त य: ता:गु खँ कनादिल। वय्‌कलं थ:के मांभाय् व थ:गु संस्कृति संरक्षण यायेमा: धइगु बिचा: प्रशिक्षणया कारणं हे ब्वलंगु खँ नं कनादिल। प्रशिक्षणयात कया: प्रतिक्रिया बीगु झ्वलय् ग्रीन पीस एकेडेमीया स्यनामिं प्रशिक्षणं मांभाय्‌या ल्याखय् थ:त पुनर्जन्म बिउगु आभास यानादिल।

नेवा: देय दबूया नाय: नरेश ताम्राकारं न्हापा थ:गु भाय्‌या लागि झी सरकारनाप ल्वानाचना। सरकारं आ अधिकार बी धुंका: झी थ:थ: हे थ:गु छेँय् थ:गु भाय् मल्हा:से दास मनोवृत्ति ब्वलंकाच्वंगु दु धयादिल। अथे हे नेवा: वस्ती नेवा: स्कूल अभियानया कजि दिपक तुलाधरं आ: जुइगु न्हूगु शैक्षिक सत्रया कक्षाय् नेपालभाषाया थीथी पत्रिका, एफएमया ज्याझ्व: व टेलिसिरियलया माध्यम कायेगु खँ कनादिल।

नेपालभाषा स्यनेकने पुच:या नाय: रमिता शाक्यं छम्ह नेवा: जुया थ:गु म्हसीका बी मफुत धा:सा मेगु न्ह्यागु हे भाय् स:सां उकिया छुं अर्थ मदइगु बिचा: प्वंकादिल।

आ: स्वनिगलं पिनेयापिं स्यनामिपिनिगु नितिं याकनं हे निक्व:गु प्रशिक्षण नं जुइत्यंगु जानकारी नं वय्‌कलं बियादिल। थौकन्हय् मुक्‍कं ५७ गू ब्वनेकुथी नेपालभाषा  ब्वंकाच्वंगु दु सा न्हुगु शैक्षिक सत्रय् थप ४० गू ब्वनेकुती नेपालभाषा ब्वंकेगु तयारी जुयाच्वंगु दु।

टिप्पणी लेख्नुहोस्

जवाफ लेख्नुहोस्

Fill in your details below or click an icon to log in:

WordPress.com Logo

You are commenting using your WordPress.com account. Log Out /  बदल्नुहोस )

Twitter picture

You are commenting using your Twitter account. Log Out /  बदल्नुहोस )

Facebook photo

You are commenting using your Facebook account. Log Out /  बदल्नुहोस )

%d bloggers like this: